A Plataforma
Galega pola Terceira República nace o 14 de Abril do 2018 a través
de distintas organizacións políticas de esquerdas e activistas a
título individual, persoas todas ligadas á loita social, sindical
e/ou política, as cales compartimos a necesidade de articular
mecanismos de participación democrática para a acumulación de forzas que culmine
nunha fronte común contra a Monarquía Borbónica e a instauración
da Terceira República.
A PLATAFORMA 3R
defínese como un colectivo da maioría traballadora, da esquerda
transformadora, republicana, plural, feminista, laica e ecoloxista. Ten como obxectivos fundamentais a ruptura co Réxime do 78
mediante un proceso democrático-popular e a conquista dun goberno do
pobo.
Desde a
PLATAFORMA 3R asumimos estes puntos como imprescindibles na nosa
acción diaria para chegar ao obxectivo de traer aos pobos do Estado Español
o mellor dos futuros posibles:
1. Superación do
Réxime Monárquico.
Por un proceso
constituínte republicano. O descontento de amplos sectores da
sociedade non se debe exclusivamente a factores do decadente neo
liberalismo, se non que tamén se debe a un compoñente claramente
político. A Transición consistiu nun complexo proceso que non
resolve as necesidades básicas da maioría social en pleno século
XXI, xa que estivo elaborada baixo as esixencias dos afíns á
ditadura anterior. En contraposición, unha nova constitución
derivada dunha consulta popular outorgaranos capacidade de decisión
fronte ao que se nos impuxo.
2. República
Democrática, Federal, Social, Igualitaria e Laica.
A alternativa
capaz de alentar aos asalariados, estudantes, autónomos ou
desempregados é o proxecto da Terceira República: Democrática,
onde as principais decisións que afectan o conxunto sexan aprobadas
por consulta popular; Federal, que supere, sen imposicións ás
nacións e pobos ibéricos, o errado e inxusto Estatuto das
Autonomías; Social, acabando co abuso e a especulación dos mercados
e poñendo a economía baixo as leis do ben común; Igualitaria, sen
discriminación de xénero, opción sexual ou raza; Laica, onde as
crenzas relixiosas non inflúan sobre a política estatal.
3. Rexeneración
Democrática.
Os Parlamentos a
día de hoxe están desacreditados pola corrupción e a nula
capacidade de renovación e evolución acordes ás demandas actuais
da sociedade. Ademais, a falta de pluralidade e de compromiso público
non melloran en absoluto esta deplorable conxuntura. O noso
compromiso é firme coa proporcionalidade na representación
parlamentaria, coa limitación do gasto electoral, coa loita contra
todo tipo de corrupción, coa eliminación de toda simboloxía
fascista e coa transparencia nas decisións políticas.
4. Dereito dos
pobos para decidir.
Só os pobos
libres que así o decidan libremente poden construír xuntos un
futuro común. O dereito para decidir é o armazón da súa unidade.
O problema das nacións no Estado español existe, e ignoralo como
fixo o poder todos estes anos, unicamente serviu para enfrontar aos
pobos entre eles. Fronte á acusación de que somos
“independentistas”, facemos nosas as reivindicacións máis
sentidas dos traballadores que compoñen o Estado Español.
Chamamos, por
tanto, ás organizacións de esquerda e aos seus activistas para
comprometernos con estes puntos, por encima de lóxicas diferenzas, a
levar este espírito unitario republicano, a que difundamos este
programa mínimo e a traballar para lograr unha imprescindible
unidade de acción.